JACQUELINE WILLSON ALUMA AVUNJWA NYONGA, AILALAMIKIA MAHAKAMA, HABARI NZIMA HII HAPA

AMA kweli hujafa hujaumbika.
Msichana Jacqueline Willson Aluma ambaye alikuwa mwanafunzi wa Shule ya Sekondari ya Dira V, iliyopo jijini Dar es Salaam alizaliwa akiwa mzima na wala hakuwa na tatizo lolote kimwili.

Jacqueline Willson Aluma akiwa na maumivu makali baada ya kuvunjwa nyonga.

Lakini pasipo kujua lengo na sababu zao, watu wamekuwa wakimfuatilia binti huyo mdogo mwenye umri wa miaka 18 sasa na kufanikiwa kumjeruhi na kumpa ulemavu, kwani baada ya matibabu ya miezi mitano katika Hospitali ya Taifa Muhimbili, ameishia kuwa mtu wa kulala na kutembea kwa tumbo.
Lakini katika hali ya kusikitisha, watu waliomjeruhi na kumpatia ulemavu huo, walikamatwa na kushtakiwa mahakamani, ingawa kesi yao imefutwa kwa kinachodaiwa kukosekana kwa ushahidi, lakini chombo hicho cha haki kikimnyima nakala ya hukumu ili aweze kukata rufaa.
Mara ya kwanza, msichana huyo alikutana na wabaya wake hao Novemba mwaka 2011 saa tisa alasiri akiwa Kituo cha Daladala cha Jeti, Uwanja wa Ndege akisubiri usafiri wa kuelekea nyumbani kwao.
Ghafla teksi moja ilisimama karibu yake na mmoja kati ya watu wanne waliokuwepo ndani ya gari hilo, alimwambia aingie ili wampeleke nyumbani, akakataa.
“Watu wawili walishuka na kutaka kunikamata kwa nguvu ili waniingize ndani ya gari, nikapiga kelele, baadhi ya watu waliokuwa karibu walinisaidia na wale watu wakakimbia,” anasimulia msichana huyo.
Alisema baada ya tukio hilo, watu hao walitoweka machoni mwake hadi walipoibuka tena Januari 14, mwaka 2012.
Anasema siku hiyo alikuwa na mdogo wake Geofrey wakichota maji bombani, wakati wazazi wao wakiwa kanisani, aliwaona watu wawili wakitembea kwa kunyata wakielekea upande waliokuwepo, alipowatazama akawatambua kuwa mmoja wao alikuwa ni miongoni mwa wale waliotaka kumuingiza ndani ya gari kwa nguvu mwaka uliopita.
“Niliamua kukimbia kuelekea kwa jirani huku nikipiga mayowe kuomba msaada, mmoja wao alinipiga ngwala na kuanza kunishambulia, nilishindwa kuinuka, mgongo ulikosa nguvu, mtu mmoja mwenye mbwa alitoka nje akanikuta niko chini, wakakimbizwa kuelekea bondeni, wazazi wangu walipigiwa simu, walifika na kunichukua hadi Kituo cha Polisi Kitunda.”
“Nilipelekwa zahanati ya hapo Kitunda ikashindikana, nilihamishiwa Amana na hali ikazidi kuwa mbaya, nikahamishiwa Muhimbili ambako nililazwa kwa muda wa miezi mitano, wakati naendelea na matibabu nilipata taarifa kuwa watuhumiwa wangu wameachiwa na kumtishia maisha baba, hata hivyo kesi ilipelekwa Mahakama ya Wilaya ya Ilala.
“Baada ya mdogo wangu kuitwa mahakamani kutoa ushahidi, nikiwa hospitalini niliwahi kuchukuliwa kupelekwa kortini kutoa ushahidi, hali ilipozidi kuwa mbaya mama akawa ananiwakilisha, lakini cha kunishangaza Aprili 25, mwaka huu, kesi ilifutwa kufuatia mpelelezi kutokwenda kutoa maelezo yake.
“Nilipomuuliza huyo mpelelezi wangu sababu ya kutofika mahakamani, alisema hakupewa samansi ya kuitwa, akasema hata yeye alishangazwa na hukumu hiyo, sikuridhika, tulipoomba nakala ya hukumu tunazungushwa tu, tulienda chama cha wanasheria wanawake TAWLA, waliiandikia barua mahakama Mei,12 Mwaka huu, hata hivyo wamekataa kutupa.
“Uamuzi ulitolewa unanipa hofu, mtuhumiwa yupo mtaani na wanatutishia maisha, nimelemaa, natembelea tumbo, nimepoteza masomo, haki yangu mahakamani nimenyimwa, hivi ni nani wa kunitetea kama siyo serikali, nikalalamike wapi miye mlemavu, nawaombeni serikali mnisaidie kufuatilia mwenendo wa kesi yangu,” alilalamika binti huyo, ambaye anadai watuhumiwa wake wanatishia kumuua endapo ataendelea kufuatilia kesi yao.
Naye baba mzazi wa mtoto huyo, Willison alisema anashangazwa na hatua iliyochukuliwa na vyombo vya dola kulishugulikia suala hili kwani kila sehemu wanakoenda wanakatishwa tamaa huku watuhumiwa wakizidi kuwatishia maisha.
“Inaniuma sana kumwona mwanangu amelazwa na watu wanaofahamika lakini wameachiwa, jalada la kesi hii ni namba 171 ya mwaka 2012 Wilaya ya Ilala, naomba wanasheria wanisaidie.”
Kwa mtu yeyote aliyeguswa na habari hii, anayedhani anaweza kuwasaidia ushauri wa kisheria, wanaweza kuwasiliana na Bwana Willson kwa 0786 515604.