BOMU LA KKKT MWANZA LAZUA HOFU KWA WANANCHI

SIKU chache baada ya kulipuka kwa kitu kilichosadikiwa kuwa ni bomu kwenye Kanisa la Kiinjili la Kilutheri Tanzania (KKKT), Dayosisi ya Kaskazini Mashariki ya Ziwa Victoria, Makongoro Misheni, Mwanza, wananchi wameendelea kuishi kwa hofu kwa kutokea mlipuko mwingine.

Kwenye mlipuko huo wa awali uliotokea Jumatatu iliyopita, mhudumu wa nyumba ya kulala wageni ya kanisa hilo, Benedata Alfred (25) alijeruhiwa na kulazwa katika Hopitali ya Rufaa ya Bugando.

Kufuatia mlipuko huo,

imeelezwa kuwa wakazi wa Mwanza hususan waumini wa kanisa hilo wamekuwa wakiishi kwa hofu kwani wanaamini kuwa aliyekuwa ametega bomu hilo alikuwa na lengo la kuangamiza watu wengi kwa wakati mmoja.

Wakizungumza na mwandishi wetu kwa sharti la kutochorwa majina yao gazetini, wakazi wa Makongoro Misheni wamesema hawana imani na mtu aliyetega bomu hilo kama atakuwa na lengo la kutimiza azima yake aliyokuwa ameipanga au atashindwa kutokana na ulinzi mkali wa jeshi la polisi ulioimarishwa.

“Tunaishi kwa mashakamashaka maana hatujui aliyetega bomu lile alikuwa na lengo gani kwetu, kitendo cha kulitega bomu hilo kanisani kinaashiria mtu huyo alikuwa na lengo wa kuangamiza watu wengi kwa wakati mmoja,” alisema mmoja wa wakazi hao.

Aidha, mwingine aliomba jeshi la polisi kuendesha msako mkali kuhakikisha mtuhumiwa wa bomu hilo anakamatwa na kufikishwa katika mkono wa sheria.

“Tunaomba polisi watusaidie kuendesha msako mkali ili mtuhumiwa apatikane na kufikishwa mahakamani ili na sisi tuwe na imani ya kuabudu,” alisema.

Kamanda wa Polisi Mkoa wa Mwanza, Valentino Mlowola alisema uchunguzi wa awali unaonesha bomu hilo lilitengenezwa kienyeji na uchunguzi unaendelea ili kuwabaini walioliweka kanisani hapo.