KUWA MSTAARABU, JIFUNZE KUSAMEHE KWANI YEYE NI BINADAMU KAMA WEWE

Ni matumaini yangu kwamba msomaji wangu uko poa kabisa, ni siku nyingine nzuri tunapokutana katika uwanja huu kujuzana mambo mbalimbali yanayohusu uhusiano wa kimapenzi, hususan wachumba au wanandoa.
Kabla sijaanza kuijadili mada yetu ya hapo juu kama inavyojieleza, ningependa nikupe mfano mdogo kuhusu watoto mapacha.
Sote tunawajua watoto mapacha. Hawa huanza kuwa pamoja kuanzia wakiwa kwenye tumbo la mama yao. Huzaliwa siku moja, hunyonya kwa pamoja na hukua pamoja. Lakini siyo ajabu kuona watoto mapacha wakigombana hadi kufikia hatua ya kuwekeana viapo au kutishia kuuana.
Sasa kama watoto mapacha waliokaa pamoja tangu wakiwa tumboni mwa mama yao wanagombana, ni dhahiri kwamba suala la ugomvi haliepukiki mahali popote hasa katika uhusiano wa kimapenzi.
Kugombana, kukorofishana au kupishana kauli ni jambo la kawaida kabisa kwa wapendanao na unapotokewa na jambo hilo, elewa kwamba halijakupata wewe tu, hata Obama anagombana na mkewe Michelle wakiwa ikulu itakuwa wewe?
Hata hivyo, kugombana ni jambo la kwanza lakini kuombana msamaha ni jambo la pili. Haina maana kwamba kwa sababu kugombana hakuepukiki basi kila unapogombana na umpendaye huo ndiyo uwe mwisho wa uhusiano wenu wa kimapenzi. Hasira ni hisia za kibinadamu kama zilivyo hisia nyingine na haziwezi kuepukika.
Jambo la msingi ni kujiuliza, wewe unapokasirika huwa ‘unam-treat’ vipi mpenzi wako? Huwa mnapata suluhu au muafaka baada ya muda gani? Moyo wako huwa mwepesi kumsamehe mwenzako kwa urahisi au mpaka wiki au miezi kadhaa ipite ndiyo umsamehe?
Je, unaweza kusamehe bure na kuyaacha maisha yaendelee au mpaka ufanyiwe jambo kubwa kama kununuliwa zawadi za gharama ndiyo usamehe? Bila shaka majibu utakuwa nayo mwenyewe.
Ninachotaka kuzungumza nawe ni kwamba, hakuna jambo muhimu katika mapenzi kama kusamehe bila masharti. Siyo tu kusamehe bali kusamehe katika muda muafaka.
Ikiwa mwenzako amekukosea leo na kukiri kisha akakuomba msamaha lakini wewe kwa sababu ambazo unazijua mwenyewe, ukakataa msamaha wake mpaka baada ya wiki mbili au mwezi kupita, msamaha wako utakuwa hauna maana.
Hakuna mapenzi mahali ambapo hakuna msamaha. Unaposamehe haina maana kwamba wewe ni dhaifu wala haina maana kwamba wewe ni mjinga. Tafsiri ya mtu anayesamehe kwa urahisi ni kwamba anajitambua, anajiamini na anaelewa kwamba hakuna binadamu aliyekamilika. Mapenzi bila kusameheana kwa dhati, huyeyuka kama barafu iyeyukavyo juani.
Mwenzako anapokukosea, lazima jambo la kwanza ukumbuke kwamba hakuna binadamu aliyekamilika. Kila mmoja ana mapungufu na mazuri yake. Badala ya kutazama yale mabaya ambayo mwenzako amekufanyia, hebu jaribu kutazama yale mazuri ambayo amekuwa akikutendea kila siku.
Ukifanya hivyo, utaona umuhimu wa kumsamehe haraka bila kumuacha ateseke kwa muda mrefu akiutafuta msamaha wako.
Acha tabia ya kutaka fidia kama njia ya kumsamehe umpendaye, wewe msamehe bure halafu yeye kwa kuuheshimu msamaha wako, bila shaka atakufanyia jambo zuri kama kukupa zawadi, kukutoa out au jambo lolote zuri ambalo litakufurahisha.
Hata asipofanya hivyo, atakuheshimu ndani ya moyo wake na ataendelea kukupenda. Ukimuacha alie, apige magoti, aumie moyo au afanye jambo kubwa ndipo umsamehe, baadaye ataelewa kwamba kumbe huna huruma naye na kwamba hujamsamehe kwa sababu unampenda ila ni kwa sababu amekufanyia jambo fulani, kitu kinachoweza kufanya penzi lenu liendelee kufifia kadiri siku zinavyozidi kusonga mbele.
Ni matumaini yangu kwa haya machache, tutakuwa tumeelewana vizuri. Kumbuka penzi la kweli husamehe haraka na huwa na huruma. Hebu jifunze kusamehe haraka na kuwa na huruma na mwenzako. Na wewe unayesamehewa, usiwe mtu wa kukosea kila siku, jirekebishe ili mtimize ndoto zenu.